雪梨雪耳蓮子百合糖水

咁簡單都要寫?
寫係因為不單止HY讚好, 連我呢個奄尖人都覺得ok. ...哈...我自己對自己o既要求有時都真係幾高, 再加上原本團火熄熄地, 攪到煮乜都HEA住煮 ....但突然整到咁好味....攪到好有滿足感...d 火湧住出黎...哈哈


同一食譜, 食材, 落o係唔同人o既手, 都會煮出唔同o既味道 , 大火...細火...適量糖鹽...煮至淋便可..... 我相信呢d 唔係作者特唔寫份量,而係有時都唔知點寫 (##就好似呢個糖水咁, 好是但 ,不過我都會寫下參考份量 , 等大家心中有概念) , 因為係要靠平時經驗同實際情況 .....大火小火→每個爐o既火力都唔同 , 調味料牌子唔同, 用o既份量都唔同....)
就算我煮左30 年飯 , 我始終都唔叻... 我雖然對煮食有興趣 , 但奈何以前無咁多白老鼠、時間 及金錢去支持我呢個興趣......


不過今年 ,發生左一d 事, 覺得自己係時候要徹底改變 , 有一d念頭o係腦海出現 , 希望自己可以為自己做一d 野... 我已經行出左第一步---獨遊台灣...而家繼續尋找緊跟住o既路線....方向可能都係煮野食...但大致未決定架...不過就呢個雪梨雪耳子白合糖水 , 攪到我好手痕...



講番呢個糖水 , 除左雪梨外 , 其他全部都係屋企有乜就用乜

材料:
雪梨          6個
雪耳        1大個
蓮子        約20粒
南北杏   約20 粒
百合        約20 粒
龍眼肉    約20 粒
冰糖適量 (呢個真係睇情況同嗜甜度 , 我逐少加至夠味)
水 約20 飯碗


除雪耳龍眼肉外 , 其他凍水落, 慢火煮1小時 . 得閒壓下材料 ,
再放雪耳龍眼肉煲20分鐘, 改大火加冰糖試味.試好味後再滾多陣熄火.

以上材料大部份都係目測... 我唔會逐粒數...哈哈
先後次序同做法, 都係我自己o既習慣 , 唔係乜乜大師傅教我架...所以唔好問點解要咁咁咁....我都答唔到你....哈哈

#### 9/6/2017 我又再煲, 但低能地落左紅棗 , 攪到搶哂雪梨味@@ ....完全無哂雪梨味 > <"